Arhu ba, yawqha miqzaq-anr byeidee dee-e khaq dzeirzaq tiqghaq jawr-eq mae.Tiqnan-aq, aqyawvq miq zaq khaqhmr byoe-anr daeqka saevqleir-e laer maerxeer xeer-awr xeqleivq-eq mae. Khaqhmr byoe-anr leikev ngae, “hegar oev hawxeir, tiqjeiq paq javnga” laer aer-awr, oekev naeq-aer tiqpov taevq-aer japyuq ni daeqka ghae-eq mae.

Khoer nar, aqyawvq tiqghaq taevq-aer caevghovq leivq-awr, ngaq-e miqzaq xirxaw mae laer noeq-awr lavq khaq caertav ni, irkanr-anr lavqjeiq bawbaw-aer jawr lei-eq mae.

Mqcivq zanrlei ngae aqyawvq miqzaq khaqhmr pi-awr ghovqlei taqgar mawr-eq mae. Khoer ngaejawr aq yawvq khaqdzeir zaq tsawqguv ir-awr ” aqjovr-aer janr-awr khaqhmr diqsaevq nya-eq lei” laer nar haq-eq mae. “Khaqhmr Aqma kawvqlar-e laer davlar gar, tseevqsiq dae-e laer bavqleivq-eq lavqngeq nae nar maer-anr biq zaw-awr xir-eqmae” laer aer naeq-eq mae.

Khoer nar khaqdzeir zaqghaq “aq circu, aq circu. Ngaq-e khaqdeir zaq nae khaqhmr bevsaev leivq-eq nga laer puzaq daezaq deq-anr bi gurgaq ir-eq mae.

Aqyawvq tiqghaq taevq-aer khawvq khaqhmr bev saevq nya ngalaer aer-awr, “aqbawr khaqhmr” laer myanr naeq-eq mae. Ar nan aryamq khoeryamq lavq khoer mirkhanq khoer khanq-eq landuq tiqduq-anr Eerzawr zaqrma tiqmawr dovlar-awr tiqnan tsawrhaq tiqghaq kawvqsaevq dzaqluvq-e mae. “Eerzawr zawr ma hemawr-anr diqsaevq nya-e ghaq-anr mirkhanq tiqpav bi uvlanr ma” laer sanqpaq dawqbivq taq-eq mae.

Garkawv khoer gar-anr yagaq-eq tsawrhaq dawq tawvluvq irhaw-eq mae. Aerkhawvq landuq khoerduq navqdee dee-e mir nae tiqghaq-iq maq urir peeq-a. Aqbawr khaqhmr khawvq tsawr myanr dov-e tsawrhaq tiqghaq pyevq-e mir nae guv-e khawvq, maqguv-e janrgevq nae, micaer tawvma xavq-awr, ganqbavq nae irhaw-eq mae.

Lanqduq dawqpae irkev ngae, Eerzawr zawr ma khoer mawr uqduq bavqdir taq-awr jawrgar hawguv-awr, nar khanpaw-aer tsawq khovq lavq ngae, karpyawr-anr ganq tanqtov-awr, landuq-anr ga anrghae-eq naeq-aer Eerzawr zawr ma khaqmae-anr ganqnae ga tsovsaevq-eq mae.

Khoer ngaejawr, mirkhanq zaqdeq dawq tawvluvq leeqgha lar-awr, “aqbawr khaqhmr-aq neema khaq-e tiq ghaq lawhawr ngar ” laer aer-awr, “aqbawr khaqhmr Eerzawr” laer sanqpaq nae tsawr myanr yawxeevq parka heeqnaer-awr mirkhanq khawvq, tiqpav parbi uvlanr-eq mae jeir.

Credit: Dawq Siq Paer Tanr